ازيكم يا شباب النهارده مش هانكون فورمال (formal ) او بمعنى آخر رسمى يعنى هنتكلم مع بعض كاننا اصدقاء او اصحاب على القهوة او الكافى. مع ان الموضوع بتاعنا النهارده عن التكنولوجيا بس حبيت اغير الاستايل علشان الشباب يتفاعل و عيب نكون داخل اكاديميه الشباب و الاقى الشباب نايم و مش مشجع . موضوعنا هايكون عن الثورة الاليكترونيه المتوقع حدوثها فى عام 2010 بالنسبه للعرب و معانا شويه امثله على ما حدث فى السنه الماضيه (2009) و نشوف المتوقع ايه فى السنه الحاليه ” عن نفسى اتوقع قفزة فى المجال الاليكترونى العربى ” و مفيش مستحيل المنافسه فى المنطقه العربيه مولعه و مشتعله فى وقتنا ده و ده السبب الرئيسى اللى جعل ياهو تشترى او تستحوز على مكتوب ” طبعا عارفين مكتوب ابو 17 مليون مستخدم فى الوسط بتاعنا ” ده مش صدفه او لغز او اهدار للمال من ناحيه ياهو بالعكس هم مخططين لاختراق السوق العربى فى المجال الاليكرونى و كل حاجه اونلاين واحنا عارفين ان جوجل اصلا اهتمامها زايد من فترة بالمستخدم العربى عكس ياهو بس بعد صفقه مكتوب ياهو بتقول انا داخله السوق العربى عن طريق اكبر المواقع فى المنطقه و كلنا عارفين ان مكتوب اشترت اكثر من موقع و منتدى حتى قبل استحواذ ياهو عليها .

عايز بس اقول قبل ما انسى فى وسط الكلام ان الـ (آيكان) و دى المنظمه المسؤله عن ادارة سوق النطاقات و الدومينات وافقت على انطلاق الدومينات باللغه العربيه يعنى العرب حققوا انجاز و خطوة هائله لانها هاتكون تقريبا اللغه الوحيده المدعومه من آيكان بحروف غير لاتينيه او انجليزيه زى ما احنا عارفين ( ممكن اكون غلطان فى المعلومه دى لان كل ثانيه فيه خبر و ممكن وانا باكتب تكون حاجه جديده نزلت بس حتى لو فيه لغه تانيه برضه دى نقطه ايجابيه للغه العربيه ) . يعنى مثلا تلاقى موقع مكتوب كده محمد.مصر او جوجل.مصر و غيرة و غيرة انا شخصيا مش بافضل هذه النطاقات بس اعتقد ان فيه ناس بتعشقها بس للاسف هاتكون مركزة اكتر على العالم العربى عكس الدومينات التقليديه اللى هى دوت كوم و دوت نت و دوت اورج و دوت انفو بتكون انترناشونال .

زى ما جوجل عربت او اهتمت بالمستخدم العربى و تحاول ياهو تقليدها دلوقتى قامت جوجل فى 2009 بالرد بانتاج خدمه جديده ( egabat) تضرب بيها ياهو انسرز ( yahoo answers )و طبعا استخدمت اللغه العربيه وده يساعد على زياده المحتوى العربى على الانترنت و زياده المستخدمين لمنتجات و مواقع و خدمات جوجل . انا شخصيا سمعت كلام كتير عن ياهو.. ان جوجل و مايكروسوفت بيحاولوا يشتروها او يستحوذوا عليها بس الشواهد بتقول انه صعب فى 2010 لان ياهو بدات التحرك الايجابى يعنى هتشترى موقع زى مكتوب و بعد كده تفكر فى انها تبيع نفسها ! غريبه جدا و اللى ياكد كلامى انها بتعمل شراكات و تعاون مع شركات اخرى و مثال على كده الاتفاق اللى عملته مع مايكروسوفت لايقاف جوجل و محاوله ضخ المزيد من الاموال عن طريق مايكروسوفت .

اتمنى ان مواقع كتير غير مكتوب تتطور و تجبر المواقع العالميه فى مواكبتها و انتاج صفحات باللغه العربيه لزياده الفاعليه.

المستخدم العربى فى ازدياد و ده هايخلى المنطقه العربيه او الشرق اوسطيه مجال للمنافسه و ده هاينعكس على الاسعار علشان كده مش هاستعجب لو جوجل اشترت موقع مصراوى مثلا. احنا عندنا الامكانيات و العقول و المصممين يبقى بس ان العقليات دى تفكر للمستقبل و تطبق اللى درسته و تعلمته ووقتها هنشوف الثورة العربيه على غرار الثورة الصناعيه .

معلومه للكل .. الانترنت صناعه و تطور و ممكن تقاس سرعه تقدم و نمو دوله بدراسه مستخدمى الانترنت و العقول التى تدير الجزء الاليكترونى . اتمنى فى 2010 يقتحم العرب سوق المنتجات الاليكترونيه مثال اللاب توب, شاشات الكومبيوتر و التليفزيون, التليفونات المحموله و اتمنى ان ارى فى السنه دى او قبل ما اموت  منتج اليكترونى مكتوب عليه صنع فى دوله عربيه ” صنع فى و ليس تم تجميعه فى ” وقتها ممكن نكون على الطريق الصح و الصورة تتعكس و نلاقى مواقع عربيه تحاول تشترى مواقع اجنبيه … ايوة عايزين العقول العربيه تشتغل .

تايلاند, الصين, فنلندا و غيرهم من الدول الكبيرة ” الان” كانت لا شيء و التكنولوجيا المتوفرة عندهم دلوقتى كانت فى يوم من الايام حاجه خيال و وهم و صعب يحققوها بس دلوقتى الصين و اخواتها اقتحموا كل المجالات فماذا نحن فاعلون ! الزمن ده زمن الصناعه و التكنولوجيا يعنى اللى بيفكر انه ينتج و يطور هاينتج و يطور بس اللى متعود انه يشترى جاهز و يشتكى خلاص هايفضل طول عمرة كده .

عايزين نسمع فى 2010 عن اول متصفح عربى للانترنت, عايزين نشوف شاشه عربيه 100% , عايزين كل المواقع و الشركات الكبيرة تعتمد اللغه العربيه كلغه رسميه و توفر لنا دعم عربى و ده مش هايتحقق الا بتوسيع القاعده عندنا و نخلى الناس اللى برة العالم العربى يشوفوا التكنولوجيا العربيه , ساعتها هنلاقى العالم كله بيحترمنا .

ملاحظه قبل الختام :

فى الوقت اللى انا بكتب فيه المقاله دى و كم التفائل الموجود عندى فى السنه الجديده باستعجب لما الاقى وزير الاتصالات بتاعنا “طارق كامل” صدق على القرار بتاع الاستخدام العادل ! انا مشوفتش دوله فى العالم محدده الانترنت و الباندويدث. عموما انا متوقع ان الدايل اب يرجع تانى قريب على الاقل هانحمل كتير آى نعم فى وقت اطول بس نعمل ايه ؟

دى بعض التكنولوجيا اللى اضافتها شركات اجنبيه ياريت فى نهايه 2010 نشوف حاجات زى دى :

موزيلا : اصدار جديد من فايرفوكس و تلافى اخطاء الماضى و اثبات جدارتها بالمنافسه فى السوق .

مايكروسوفت : بعد فشل فيستا لحقت نفسها بويندوز سيفن او سفن او 7 انت و ضميرك بقى المهم مايكروسوفت انقذت نفسها بالنسخه دى .

وكمان دلوقتى فيه نسخ مجانيه من الاوفيس من مايكروسوفت و بتكون اونلاين و تقدر تستخدمها كانها على جهازك وانتجت مايكوسوفت اول انتى فايرس خاص بها و هو سكيوتري إثينشالز و حصل على نسبه تحميل عاليه جدا فى الاسبوع الاول تقريبا 1.5 مليون تحميل فى اول اسبوع .

تعاون “جوجل” مع شركات “أسير” و”إتش بى” و”توشيبا” وأسوس” و”لينوفو” وأيضا “أدوبى سيستميز” اثمر على نظام تشغيل لم ارة الى الان بالاضافه الى متصفح كروم و ده بيقول ان جوجل قادمه بقوة ( استخبى يا مايكروسوفت ).

نروح للطباعه هنلاقى إبسون طبعا معاها الجديد وهو ستايلس فوتو بي 50 ودى بتطبع 38 صفحه فى الدقيقه و كمان ديل ضربتها بالطابعه الليزر اللى بيعتبروها اسرع طابعه موجوده فى الوقت الحالى و دى بتطبع 47 صفحه فى الدقيقه بس على وجه واحد انما لو على وجهين يبقى هتطبع 37 .

الجديد مع الكومبيوتر اليابانى و كاميرة إيه أو إس 7دي او (AOS7D) ودى بقى وضوحها 18 ميجا بيكسل بس من كانون, ردت عليها سامسونج بكاميرتها اللى فيها شاشتين عرض !

و الكثير و الكثير من الاجهزة ( لاب توب, شاشه تليفزيون, بلازما وكل الاليكترونيات ) . وان شاء الله بعد سنه اكتب مقاله عن التطور الهائل لدى العرب .