المشروع القومي للإستثمار و التنميه الخاص بتدريب و تعليم و توظيف شباب مصر

السلام عليكم ورحمة الله و بركاته .. بالسلام نبدأ لأن الغرض من التدوينه في هذا الوقت هو بث السلام و الطمأنينه إلى قلوب جميع طوائف الشعب المصري و ليس المصري فقط بل العربي و الإسلامي. أنا لست وزيراً أو رئيس جمهوريه أو حتى رئيس عمال, فقط انا شخص يدعى محمد شكري أحمد و أعمل محاسباً و أدير هذه المدونه. خطر ببالي أحد الأفكار و كثيراً ما يخطر ببالنا مثل هذه الأفكار ففكرت أن أطرحها لكم لعل أحدكم يكون مسئولاً يوماً من الأيام و ينفذها او على الأقل ينفذ ولو جزء بسيط منها. من الممكن ان تكون هذه الفكره طرأت لأحد الأصدقاء منكم أو لكم أنتم و لكنها لا تزال فكره, أنا الآن أطرحها برؤيتي الخاصه ومش بأفكر أنفذها بنفسي لأنني ببساطه غير مؤهل لقياده الفكره و طبعاً كوني أنشرها يعني عدم التطلع إلى الربح المادي منها.

السؤال هنا إيه الفكره ؟ و طبعاً الأسئله التقليديه زي ” هنطبقها إزاى, منفعتها .. إلخ “

على فكره المشروع ده ناس كتير بتعمله, مش إختراع يعني بس الفكره إن الموضوع يكون على واسع و في النور يعني كل جمهورية مصر العربيه تعرفه و تسمع عنه و تدرسه و تشارك فيه كمان, لو حصل أتحدى إن مصر هاتكون غول إقتصادي في وقت قياسي. بنعدي كتير على محلات و شركات مهما كانت سواء كبيره أو صغيره مكتوب عليها ” مجموعة شركات فلان و شركاه “, محل فول و طعمية فلان و شركاه ..

شركاه تعني ناس مشاركه في المشروع ” بتشارك صاحب المشروع نفسه و ممكن تدير معاه المشروع بس طبعاً مش هنذكر أساميهم شخص شخص “. طيب يا عم إيه الجديد !

أبسط الفكره .. فكرة و شركاه يعني هنشارك بعض بس مش إتنين ولا تلاته لا هنكون كتير علشان نبدأ مشروع كبير و نستفيد أكتر .

زي الريان و السعد كده ؟

مين جاب سيرة أشرف السعد و أحمد الريان .. إنتم بتتفرجوا على التلفيزيون كتير بس عامة هي فيها ملامح من شغلهم ” أنا مش عندي معلومات كتيره علشان أعرف هم كانوا نصابين ولا فعلاً كانوا بيشتغلوا “.

إيه يا عم إنت ناوي تسرقنا ولا تخلي الناس تسرقنا !!

لا أنا لا ناوي أسرقكم ولا أنصب عليكم ” إفتكروا كلامي في أول المقاله ” أنا مش ليه مصالح غير إني أشوف البلد بتتقدم و قلت مش عايز أنفذ لاني ممكن غير مؤهل و كمان هاكون متحيز للفكره.

الريان و السعد و الشركات اللي زي دي كانت شغاله في توظيف الأموال صح ؟

ياعم دول نصبوا على الناس

أنا قلت ماعرفش ظروفهم .. أنا هنا بتكلم على الفكره حتى لو هم نصابين الفكره اللي الناس إقتنعت بيها إيه ؟

إنهم يشغلوا الفلوس للناس و كانت نسب الأرباح كبيره و تغري أي حد دا حتى كانت أكتر من فوائد البنوك !

طيب إيه اللي هد المشروع ؟ ممكن نجاوب على السؤال ده بموضوعيه ؟

آه نسيت سؤال مهم جداً .. تعرفوا الأول فكرة عمل البنوك ؟

دي حاجه بسيطه, بنك بيجمع الأموال و بيشغلها و بيوزع أرباح دا غير المعاملات العاديه اليوميه زي الحوالات و الكلام ده, و فيه ناس بتستحرم شغله و ناس مش بتفرق معاها و البنوك تعتبر حاجه مهمه أوي

ممتاز طيب الفكره بقى تعتبر مزيج من فكرة توظيف الأموال و البنوك

شركات توظيف الأموال على الرغم من شكوكي إنها كانت مقامه بغرض النصب إلا إنها كان فيها عيب كبير جداً و العيب ده هو اللي وقع الشركات دي.

إيه العيب

العيب في الجدول الزمني, أي تجاره بيكون ليك وقت إسمه وقت جني الأرباح من النشاط التجاري الخاص بك, و وقتها لازم تكون السيوله في أعلى قيمها لان في الوقت ده كل المساهمين و الشركاء ممكن يطلبوا أموال ” أرباح أو غيره ” و وقتها الشركه ملزمه إنها تدفع. في شركات توظيف الأموال معظم الفلوس كانت في السوق في هيئة أصول متداوله و ثابته و طبعاً توزيعات الأرباح كانت سنويه علشان كده لما الحكومه زنقت عليهم و بدأت إشاعات إن الشركات دي نصابه ” فيه بعضها كان نصاب ” الناس بطبيعة الحال قدمت بلاغات إنها بتتعرض لعملية نصب ” وقتها كانت ناس كتيره مستثمره ثروتها كلها “. اللي حصل إن معظم المساهمين إن لم يكن أكثرهم طلبوا إستثماراتهم مره واحده و بالتأكيد السيوله متسمحش فزاد الشك إن الناس دي حراميه ” مش شك ده يقين “. أنا شخصياً أسمع إن فيه نشاط كان مبني على السلع التموينيه و بيع و مكسب بدون إستثمار ” تشغيل دماغ بس ” و الكلام ده من ناس مقربه من أشرف السعد و إشتغلت معاه, طبعاً مش كل اللعب كان بالطريقه دي  لانه كان فيه مزارع و أنشطه مشروعه زي العلاقات مع دول تانيه لإستيراد سلع عجزت الدوله عن إستيرادها ! ( زي ما قلت الكلام على لسان شخص عمل مع أشرف السعد لمده و كان من المقربين ) .

علشان كده الحكومه حرزت و أخدت و وقفت كل حاجه تابعه للشركات دي و بدأت توزع الفلوس و البضاعه على المستثمرين ” طبعاً كل واحد ما بيصدق أي حاجه أحسن من مفيش ” بس لما تاخد ثلاجه ثمنها 200 جنيه بمبلغ 350 و تخصم من رصيدك عند الشركه هتندم اكتر. أنا هنا مش بتكلم على المسلسلات أو الدراما التلفيزيونيه بتاعتنا لا أنا بتكلم عن حاجات لازم تحصل لو فكرنا بالبديهه. الحكومه تصرفها كان غلط × غلط لانها المفروض تدرس و تشوف إزاى الناس دي كانت بتشتغل و ليه أرباحهم كانت عاليه ولو خلاص هتصادر الأموال و الشركات الخاصه بيهم و هتحاكمهم ماشي كانت أخدت كل ده و شغلته زي ما كان ماشي إلى أن توزع كل الأموال على المساهمين و بعد كده تحبسهم ولا تولع فيهم المهم إنها تعدي فترة الثوره على الشركات دي و الحساب آخر ” الجلسه “.

ملحوظه صغنونه : الشركات دي فعلاً كانت بتوزع أرباح أعلى من البنوك بكثير ” ضعف أو 3 أمثال ” فبالتأكيد البنوك إتأثرت و البنوك وقتها تابعه للدوله لان صعب واحد يستثمر مع بنك بيوزع 7% أرباح و فوائد و يسيب شركه بتوزع 20% ولا 25% أرباح ” دا بالمنطق ”

شركات توظيف الأموال كانوا نصابين

المشروع مش هايكون فيه نصب
البنوك فيه إختلاف على إنها بتشغل الفلوس في الحرام أو النظام المتبع هناك به شبهات ” المشروع إن شاء الله هايكون حلال و مش هايشتغل في حاجه الناس مش عايزاها ”

فيه معلومه الجميع لازم يعرفها .. مين بيضمن أموال المودعين في البنوك و مين بيمارس الرقابه على البنوك ؟ الحكومه

إيه يا عم محمد فيه حراميه في كل حته حتى الحكومه و البنوك

النقطه دي أتفق فيها معاكم تماماً بس لو كانت الحكومه دي هي إحنا ” مالكي الأموال ” يبقى الحرامي إذا كان موجود هنمسكه بسهوله ” صح؟

إنت حيرتنا معاك ” لخص “

ماشي هالخص .. كلكم تعرفوا ناس بتشغل الفلوس بالفعل و أرباحهم أعلى من البنوك هاتسأل إزاى أقولك لانهم أصحاب المال يعني مفيش نثريات بتندفع زي الي بيحصل في البنوك ” أنا مش بقول البنوك حراميه و كده لا بس بقول أصحاب المال لما بيديروا المشروع بيكون أفضل ” و طبعاً الربح بيكون صافي لأصحاب الأموال مش زي البنوك تقسم معاك الربح !

البنك بياخد 100 الف جنيه مثلاً حضرتك آخر السنه تاخد فوائد ” 10% ” يعني 10000 جنيه صح ؟

صح

روح خد قرض من البنك ” هتدفع فائده مش أقل من 30% و إنت طالع ” صاحب الفلوس ياخد الـ 10% بتاعته و الباقي للبنك و على فكره كلامي واقعي و ممكن تروح تسأل بنفسك في أي بنك. يعني إنت لو بتشغل فلوسك بنفسك هتاخد على الأقل 30% ربح سنوي.

ده اللي شركات توظيف الأموال حاولت تعمله بس مكانش فيه تنظيم ” و بالتأكيد نشاط زي ده المفروض ترعاه الحكومه و البنوك لأنه لو تم باطني أو بدون معرفة الحكومه بمقدار واسع البنوك هاتفلس ” .

هنعمل مصنع

مصنع إيه ؟

مش هايفرق النشاط مصنع ورق, مصنع منتجات ألبان, مزارع أسماك و ثروه داجنه, مصنع منتجات عذائيه .. إلخ المهم هانعمل مصنع

إزاي أعمل مصنع ولا مشروع أنا مش بأفهم فيه ؟

هتشتغل في اللي بتفهم فيه و هتلاقي كتير على مستوى الجمهوريه ليهم نفس الإهتمام بتاعك و عايزين برده يعملوا مشروع و بيدوروا عليك

خلاص خلاص هانعمل مصنع طيب يا عبقري فين فلوس المصنع

إحنا اللي هانمول الفلوس زي شركات الأموال … أسهلها, لما حضرتك بتخلص كليه والدك بيكون مستعد يدفع على الأقل 10000 جنيه ولا 20000 جنيه علشان تشتغل صح ؟

ياعم مال ده و مال ده

ماهو بدل ما تدفع الفلوس علشان تشتغل ولا تسافر فيزا حره للسعوديه و تتبهدل ممكن تدخل مع مجموعه ليها نفس ظروفك في مشروع إنتم متفقين عليه و كله هايتم تحت إشراف الحكومه اللي هتنشأ بنوك مخصوصه للمشاريع دي و البنوك الحاليه لو عايزه تشارك و تدخل موديعيها في المشروع مفيش مشكله بس كله لازم يظهر للمودع و يعرف و يأكد على إنضمامه. ووقتها هنلاقي فرص عمل

فرص عمل يعني كوسه هههه

صح هايكون فيها كوسه, بس كوسه مسموح بيها .. كوسه تسمح إنك تشتغل في ملكك

ملكي إزاى؟

هو مش إنت هاتشترك مع مثلاً 100 شخص زي حالاتك في المشروع ؟ يبقى نسمح إن كل واحد يشغل إبنه و كل واحد على حسب مساهمته و مجلس إداره منتخب من المودعين في الحاله دي حضرتك بدل ما تدفع رشوه 20000 جنيه علشان تشغل إبنك ولا بنتك ولا أخوك لا حضرتك هاتدفعهم في مشروع و هتشغل إبنك ولا بنتك و في نفس الوقت فلوسك موجوده و مضمونه ” بضمان الحكومه ” يعني اللي إنت عايز تشغله هايشتغل ببلاش و هياخد مرتب كويس ” على حسب النشاط ” و هتاخد أرباح كل سنه و هتضمن إن اللي بيشغلك فلوسك مش هايسرقك و هايكون خايف على كل قرش بيندفع لانها فلوسه. كده تخيلوا كام فرصة عمل هتتوفر ؟

عارفين التوكتوك ؟

إيه يا محمد إيه دخل التوكتوك إحنا هنشتغل سواقين ولا إيه ؟

لا التوكتوك مشروع أحادي مينفعش لان اللي بيديره واحد ولا إتنين أنا أقصد إن التوك توك بيجيب تمنه بعد سنه ” ده معناه إنه بيحصل ربح يصل إلى 100% ” دا مثال لأبسط مشروع

لو الـ 100 شخص كل واحد دفع 20000 جنيه .. يعني المبلغ الإجمالي هايكون 2 مليون جنيه .. ممكن نبدأ بيهم مشروع إحنا الـ 100 متفقين عليه و أكيد الـ 100 دول هنلاقي فيهم مهندس و محاسب و عامل و كده … يعني فئات مختلفه نقدر ننتقي منهم 10 بالإنتخاب علشان يديروا المشروع. دا إنت ممكن تشغل إبنك و عيالك كلهم و قرايبك كمان كل ما المشروع بيكبر.

طيب لما أنا إحتجت الفلوس دي و عايز أخرج ماهو برده هانتعرض لنفس موقف شركات التوظيف ولا إيه

أولاً حضرتك الفلوس دي المفروض إنت كنت دافعها و مكنتش مستني أي عائد منها ” يعني كانت هاتبقى عباره عن رشوه ولا إكراميه لشخص فاسد و مكانتش هاترجعلك تاني ” إحنا بنرجعهالك.

ثانياً مش معني النقطه الأولى إنك تنساها و مش هتاخدها لا أنا بوصلك فكرة إن المشروع غير تفكيرك من فلوس تعتبر ضايعه إلى فلوس موجوده و بتشتغل.

ثالثاً بص يا سيدي فيه قوانين هتتعمل و هاتكون ملزمه لكل الناس, بمعنى هايكون الخروج من المشروع بعد سنتين مثلاً إلا في حالة إتفاق كل المساهمين على إنهاء المشروع و فيه حالات كتيره زي مثلاً كل الأعضاء المساهمين محتاجين يخرجوا ماعدا شخص أو إتنين هنا لازم طرف ثالث يتدخل ” الحكومه ” و تقعد مع ممثلين للفريقين و تحاول التقييم و تأخد القرار مثلاً القرار يكون ” أحقية العضوين الغير موافقين على الإستمرار لجدوى المشروع ” ساعتها الحكومه تشترى ” لأنها حكمت إن المشروع ناجح وده هايكون زي رقابه على الحكومه نفسها لان ممثلها أكيد هيصدر قرار صح لانه لو قال المشروع بالحاله الحاليه مينفعش يكتمل الحكومه هتضطر إنها تبدأ التصفيه علشان كل مساهم يأخذ حقه ولو قراره العكس يبقى تشتري الحكومه حصة المساهمين الخارجين

طيب الحكومه هاتشتري إيه ولا إيه ؟

الحكومه هاتشتري مشاريع هي قالت عبر ممثليها إنها ناجحه و الإستمرار فيها مثمر يعني مشاريع هتعمل دخل جامد للحكومه و بالتالي للشعب.

توزيعات الأرباح هايكون ليها وقت كمان .. يعني كل سنه في يوم كذا في شهر كذا ” معاد معروف ” و مجلس الإداره ملزم إنه يجمع الجمعيه العموميه ” الـ 100 مساهم ” و يوضحوا لهم كل المدخلات و المخرجات و الأرباح و الخسائر.

الحكومه ممكن تضع لها مراقب في كل المشروعات دي علشان لو شاف إن فيه تجاوزات أو قرارات خاطئه يبلغ و يستبعد العضو الفاسد. المشاريع دي المفروض تعامل أفضل من معاملة المستثمر الأجنبي يعني الضرايب بدل ما تاخد إعفاء لمدة 7 سنوات تكون 10 سنوات مثلاً.

في حالة التوسع و الرغبه في زيادة الإنتاج مثلا يحرم  المساهمين من الأرباح لمدة عام و بالتالي تتم التوسعات على مراحل بحيث توزع الأرباح سنه و تحجب سنه للتوسعات اما في حالة رفض مساهم للتوسعات فيأخد نصيبه من الأرباح و تتم التوسعات ” في هذه الحاله تقل نسبته في المشروع لصالح الشركاء ” سيظل المبلع المدفوع كما هو و لكن الشركاء ضحوا بمبلغ الأرباح في نظير التوسعات فبالتالي نسبتهم تزيد عن العضو الغير مساهم.

تجانس المساهمين مع بعضهم البعض يجعل المشروع أقرب إلى النجاح مثلاً النشاط هايكون طبي بحت ” مينفعش المساهمين يكونوا جزارين ! ” المناسب يكون من العاملين في مجال الطب هايكونوا متفاهمين أكثر و بالتالي قراراتهم هاتكون متناسقه والإختلافات في الرأي هاتكون أقل.

طيب و مين اللي هايحط القوانين دي ! ؟؟

أكيد مش أنا … الدوله فيها ناس أكفاء لان كمان المحاكم المختصه في النزاعات دي هاتكون محاكم غير العاديه يعني زي ما محكمة الأسره بتحكم في القضايا الخاصه بالأسر المصريه .. فيه محاكم معينه ” جديده أو قديمه ” هي المختصه في الحكم في مثل هذه القضايا.

المشروع مش زي المشارع للناس العظماء زي مشروع ممر التنميه للدكتور فاروق الباز لا هو حاجه بسيطه” انا مش بقارن ” و للعلم ممكن يضاف ليه فقرات و قواعد و قوانين لان دي رؤيتي للمشروع و طبعاً فيها أخطاء و سلبيات و اكيد كل من سيقرأ الموضوع سيضيف إليه و أرحب بالإضافات.

المشروع مطبق بالفعل بس على صغير و من غير ضمانات ماهي إلا الكلمه و أوقات بتكون فيه عقود و الناس بتشتغل فعلاً بضمير و الأرباح بتكون كويسه و زي ما قتلتلكم مضمونه لان الموظفين هم أصحاب المال. على فكره الأرقام متغيره يعني مثلاً لو فيه مجموعه من الأثرياء اللي ممكن يدفعوا لتعليم أولادهم في الجامعه الأمريكيه او الأكاديميه البحريه أو حتى يلهثون وراء من يدخل أبنائهم الكليات العسكريه ” يدفعون الآن على الأقل 100000 جنيه ” لو تجمع 20 منهم فقط على مبلغ 2 مليون فسنحتاج فقط 20 شخص او مساهم !

نفس الكلام على مبلغ الـ 2 مليون من الممكن ان يكون 3 مليون أو 1 مليون أو أقل على حسب المشروع و سنجد مثلاً عشرة أشخاص متمثلون في شخص واحد يتقدمون للدخول مع الفئه الأعلى نظراً لربحيتها العاليه و لنجاح مشروعاتهم.

الشعب المصري معروف إنه شعب إستهلاكي من الدرجه الأولي لذلك المشروعات و السلع الإستهلاكيه هي أنجح تجاره. تابع الطريق الصحرواي ( مصر – إسكندريه ) ستجد كم بضائع هائل ينتقل يومياً من و إلى القاهره و الأسكندريه, البلد فيها تجاره و شغاله و مش فيها ركود. الأزمه الإقتصاديه وقفت العالم كله و هنا الوضع كان طبيعي, للعلم الأنشطه و المصانع المقامه ” تحت بير السلم ” تعتبر إقتصاد لا يتأثر بالإضافه لتحويلات العاملين بالخارج بالمناسبه السعوديه تتعامل بطريقه مصرفيه أنا أراها أفضل من المتبعه في مصر ” عند ورود تحويل إلى أحد الأشخاص عن طريق البنك بالدولار, البنك يصرف هذه الأموال فقط بالريال السعودي و ليس بالدولار ” . أنا مش بأشبه الموقف ده من البنوك السعوديه بقناة السويس لان هنا الحكومه السعوديه عايزه تأخذ الدولار علشان يكون متوفر

تخيلوا كم المشروعات التي ستقام في جميع أرجاء المحافظه الواحده

تخيلوا كم الوظائف التي ستكون متاحه لأبناء الوطن

تخيلوا الأرباح التي سوف تجنى بسبب المشاريع المقامه

تخيلوا كم الإستثمارات الأجنبيه التي سترغب في المنافسه

تخيلوا كم الحركه التي ستحدث في التجاره الداخليه

تخيلوا كم سيبلغ متوسط دخل الفرد او حتى مستوى المعيشه

سنعدد المكاسب .. سنرفع بعض الحمل عن كاهل الحكومه و سنري العالم كيف أصبحنا نعتمد على أنفسنا. كيف سنبني الوطن بأموال لم تكن في الحسبان, بأموال كنا ندفعها لمرتشين فقط لنحصل على وظيفه لأحد الأبناء, الآن الأبناء سوف يعملون, يديرون, يربحون و يساهمون في مشروعات بأموال لازالت متاحه لهم.

سنحسن التعليم, لأن الطالب سيحسن آداؤه لانه يعرف أن فرصته موجوده بعد تخرجه فلن نجد من يعمر بالكليات لمده 10 أعوام .. الكل منتظر إنتهاء تعليمه للحصول على الوظيفه.

سننمي الوطن و نظهر قدرتنا الحقيقيه على مواجهة الفقر و الطبقيه, سيعمل خريج بكالوريوس التجاره قسم محاسبه كمحاسب, سيعمل المهندس كمهندس, سيعمل الفني فني و لن يعمل المدرس كعامل, الأول على الدفعه كعامل أرشيف لا هيبقى معيد و دكتور, سيحب كل دارس دراسته و مهنته المستقبليه, و لن تتحول العمليه التعليميه إلى روتين.

المشروع ده أعتقد أفضل من البورصه و آمن جداً ” إستثمار آمن ” يعني مش في لحظه فلوسك تروح منك لا, و للعلم كل المشاريع الكبيره كانت في البدايه صغيره, وكل رجل أعمال ناجح كان في البدايه مجرد شخص طامح.

كثير من القراء يقرأون تدوينات طريق الشباب لعل أحدهم في يوم من الأيام يكون مسئول فيهتم بهذا المشروع و أيضاً معظم المسئولين الآن لديهم حسابات خاصه على مواقع الشبكات الإجتماعيه ” فيس بوك, تويتر, ديج و غيرهم ” فأتمنى من الجميع فقط مشاركة المقاله و الفكره للجميع لعل أن تطبق في يوم من الأيام.

محمد شكري أحمد – طريق الشباب

مرحباً بك في مدونة طريق الشباب.. إذا كانت هذه زيارتك الأولي فإني أنصحك بالأشتراك في خدمة الخلاصات للحصول على كل جديد بإستمرار. نشكرك على زيارتك للمدونة!